534/2026-2027

Lunglei, 2026 Ṭomir thla ni 14: Vawiin khan Mizoram sawrkara Rural Development & Administration Department (RD&AD) Minister Prof. Lalnilawma chuan Lunglei District-a a hmasa ber leh Mizorama a pathumna tur, Community Managed Training Centre (CMTC) & Gender Resource Centre (GRC), Lungsen a hawng.

CMTC Conference Hall, Lungsena a hawnna inkhawm buatsaihah Khuallian Prof. Lalnilawma chuan Self Help Group-in a tum pakhat chu mahni inrin tawkna neih a nih thu sawiin, CMTC hawn thar chuan SHG nuho chu an inring tawk tawh hle tih a lan chiantir thu a sawi a. Hmeichhiate chu chhungkaw tana mi pawimawh leh khai dingtu ber an ni chho tawh tih sawiin, sawrkar pawhin an chanvo a dah pawimawhin, hmasawnna kawng a dapsak reng tih a sawi a. CMTC chu a hawn tawhnaah ṭangkai taka hman a nih thu sawiin, CMTC Lungsen pawh chu ṭangkai taka hman a nih a beisei thu a sawi a. Lungsen RD Block tan bik SHG dawr 6 sakna tur tih fel a nih tawh thu leh national highway pal tlang a nih avangin phalna hmuh hun hunah sak nghal a nih tur thu sawiin, Lungsen leh a chhehvel chu khualzinte tlawh tam hmun (tourist site)-a siam turin hma lak chhoh mek a nih thu leh chumi hun atan chuan khualzinte tan pawh CMTC hawn thar chu ṭangkai hle tura beisei a nih thu a sawi.

MzSRLM Lungsen Block hnuaia Thorang–I Cluster Level Federation enkawl tur Community Managed Training Centre & Gender Resource Centre Lungsen hawnna inkhawm hi Lungsen Block Development Officer Pu Lalhruailiana Zote chuan a kaihruai a. MzSRLM Chief Executive Officer Pi Zosangzuali Pachuau chuan technical report pein, Lungsen RD Block-ah hian kum 2019-ah MzSRLM a luh thu leh tun dinhmunah thawktu mi 10 awmin, Self Help Group 224, Village Organisation (VO) 20 leh Cluster Level Federation (CLF) 3 a awm thu a tar lang a. SHG member 79,833 aṭangin kum khata cheng nuai 1 la lut tling 'Lakhpati Didi' 350 an awm tih a sawi bawk.

He hunah hian RD&AD Additional Secretary Pu V. Lalengmawia, ZPM General Headquarters Vice President Pu C. Lalnunnema leh Thorang–I CLF President Pi Zoramthangi te'n thu an sawi bawk a. MzSRLM Lungsen Block Mission Manager Pi Zothanpuii Hmar chuan lawm thu sawiin hun a khar.

Vawiina hawn tak CMTC Lungsen hi 79ftx26ft-a zau a ni a. A building sak nan leh a chhunga thil dah tur lei nan cheng nuai 43.5 sen niin, Gender Resource Centre siam nan hian a hranpain cheng nuai 5 dawn a ni bawk a. Pindan pali – Gender Resource Centre, Training Hall, Kitchen cum Dining Hall leh riahna (Dormitory with Bathrooms) a awm a. Mi 26 an riak lut thei dawn a ni.